Հաքերները հարձակվել են Apple ընկերության համակարգչային ներքին ցանցի վրա` օգտագործելով վնասակար ծրագիր: Ընկերությունում հաստատում են, որ հաքերներին չի հաջողվել տիրանալ գաղտնի նյութերին: IT-հսկայի թոփ մենեջմենթում չեն բացառում, որ Apple-ի վրա հարձակվել են Facebook-ը ավելի վաղ կոտրած նույն հաքերները: Ավելի վաղ կիբերանվտանգությամբ զբաղվող Mandiant ամերիկյան ընկերությունը հարձակումների մեջ մեղադրել էր Չինաստանի հաքերներին: Ըստ Mandiant-ի պնդման` ՉԺՀ-ի Ժողովրդական բանակի 61398 բաժանմունքը պարբերաբար գողանում է շուրջ 141 կազմակերպություններին պատկանող հարյուրավոր տերաբայթանոց տվյալներ: Այդ երկրի իշխանությունները հերքում են բոլոր մեղադրանքները, հայտնում է rbc-ն: Հիշեցնենք, որ փետրվարի 16-ին Facebook-ից հայտնել էին հաքերների հարձակման մասին: Ընկերությունից հայտնել են, որ մասնագետները ցանցի աշխատանքներին միջամտության հետքեր էին հայտնաբերել դեռ մեկ ամիս առաջ:
| 