Ամերիկացի կինը հինգ տարի անց հետ է ստացել իր լուսանկարչական սարքը, որը լողալով 6 հազար կմ էր անցել: Ջորջիա նահանգի 32-ամյա բնակչուհի Լինդսի Սքելենը Հավայան կղզիներում հանգստանալու ժամանակ սարքը պատահաբար գցել էր օվկիանոսը, տարիներ անց այն հայտնաբերվել է Թայվանի ափերում, հաղորդում է Daily News America-ն:
Սարքը հայտնաբերել է China Airlines ավիաընկերության աշխատակից Դուգլաս Չենգը: Դրա հիշողության քարտը բոլորովին չէր վնասվել, եւ հնգամյա վաղեմության լուսանկարները հայտնվել են Facebook-ում: Սոցցանցի օգտվողներն սկսել են ակտիվորեն տարածել եւ վերջապես դրանք տեսել է Լինդսի Սքելենը: China Airlines ընկերությունը Սքելենին նույնիսկ առաջարկել է հատուցել սարքը հետ ստանալու համար Թայվան մեկնելու բոլոր ծախսերը, գրում է NEWSru.com-ը:
Աղջիկը Հավայան կղզիներում հանգստացել էր 2007թ., որտեղ Սեւ ժայռ ափի մոտ գիշերային լողորդության ժամանակ սարքը դուրս էր պրծել նրա ձեռքերից: Երբ ալիքները այն դուրս էին նետել Թայվանի ափերում, սարքը պատված էր եղել ջրիմուռներով եւ խեցիներով, սակայն ջրակայունության շնորհիվ, այն անվնաս էր մնացել:
