Սենսացիոն հայտնագործություն են արել պերուացի հնէաբանները. երկրի հարավում նրանք հայտնաբերել են հինավուրց թռչնի քարացած մնացուկներ, որն ապրել է 35 միլիոն տարի առաջ, հաղորդում է «ՌԻԱ Նովոստին»՝ վկայակոչելով տեղի ԶԼՄ-ներին։

Խոսքն, ըստ երեւույթին, հսկայական հավալուսնի մասին է, որի բարձրությունը հասել է  1,8 մետրի։ «Գտնված մնացուկների վրա նույնիսկ պահպանվել են մաշկի հետքերը, սա սենսացիոն հայտնագործություն է, քանի որ մենք չունենք որեւէ երկրում նման բանի փաստագրված տվյալներ», - ասել է հնէաբան Կլաուս Հենինգերը։

Գիտնականները համարում են, որ թռչունների այս տեսակն ապրել է այսպես կոչված օլիգոցենի դարաշրջանում, որը սկսվել է մոտավորապես  40 միլիոն տարի առաջ եւ ավարտվել  23 միլիոն տարի առաջ։

Թռչունի մնացուկները հայտնաբերվել են Իկա ծովափնյա տարածաշրջանի անապատում, որի միջով հունվարին անցնում էր «Դաքար - 2013» ռալլիի ճանապարհը։ Սա լրջորեն մտահոգում է պերուացի գիտնականներին, ովքեր համարում են, որ այդ մրցավազքը լուրջ վնաս է հասցնում գտածոներին։

Հենց Իկա տարածաշրջանի անապատային շրջաններում են ավելի վաղ բազմիցս հայտնաբերվել հնագույն կետերի, հսկայական շնաձկների ու պինգվինների  մնացուկներ։