Պակիստանի արեւմտյան Բելուջիստան նահանգում ձերբակալվել է 10-ից 16 տարեկան երեխաների խումբ: Նրանք խոստովանել են, որ օգնել են իրականացնել առնվազն տասնյակ ահաբեկչական գործողություններ Քվետտա քաղաքում: Ձերբակալված երեխաների հստակ թիվը չի հաղորդվում: Նշվում է, որ ձերբակալվել են եւս 11 չափահաս ահաբեկիչներ:

Ինչպես հաղորդում է Geo News-ը, ահաբեկչական կազմակերպությունները երեխաներին օգտագործել են պայթուցիկ սարքերը բազմամարդ վայրերում տեղադրելու համար: Երեխաներից յուրաքանչյուրը դրա համար 20-ից 50 դոլար գումար է ստացել:

Հունվարին եւ փետրվարին Քվետտայում երկու պայթյուն է եղել, որոնք 200 մարդու կյանք են խլել: Ահաբեկչությունները ողջ երկրով մեկ բողոքի ալիք էին հարուցել: Պատասխանատվությունը ստանձնել էին սուննիական «Լաշքար-է-Ջանգվի» խմբավորման գրոհայինները: