Օրեգոն նահանգի Մադրասից ոչ հեռու գտնվող մայրուղում 500 միլիոն մեղու տեղափոխող բեռնատար է շրջվել, հայտնում է UPI-ն: Միջադեպը տեղի է ունեցել մարտի վերջին: Կատարվածի հետեւանքները վերացնելու գործողությանը մասնակցել են մեղվաբույծների տեղի միության ներկայացուցիչները: 

Ըստ բեռնատարի վարորդի` վթարը տեղի էր ունեցել այն պահին, երբ ինքը փորձել էր խուսափել ճանապարհին հայտնված ինչ-որ կենդանուն հարվածելուց, սակայն կորցրել էր մեքենայի ղեկավարումը: Դրա հետեւանքով բեռնատարը դուրս էր եկել մայրուղուց եւ շրջվել: Վարորդը ոչ մի լուրջ վնասվածք չի ստացել, հաղորդում է Lenta.ru-ն:

Դեպքի վայր են հրավիրվել մեղվաբույծներ: Հագնելով պաշտպանական համազգեստներ` նրանք ստուգել են բոլոր 200 փեթակները: Մեղուները չեն տուժել: Նրանց տարել են ֆերմա, որտեղ սպասել են այլ բեռնատարի: