ՆԱՍԱ-ի ղեկավար Չարլզ Բոլդենը հայտարարել է, որ Երկրում աստերոիդի ընկնելու դեպքում մնում է միայն աղոթել: Այդ մասին գրում է բրիտանական Daily Telegraph թերթը:
«Մենք ԱՄՆ-ի բնակչությանը սպառնացող ոչ մի աստերոիդի մասին տեղեկություն չունենք: Սակայն եթե պարզվի, որ նման աստերոիդ կարող է ընկնել Երկրի վրա, ասենք, երեք շաբաթ անց, ապա աղոթեք», - հայտնել է Բոլդենը: Նա բացատրել է, որ նման սպառնալիքի առաջացման դեպքում առաջիկայում ԱՄՆ-ն դժվար թե որեւէ բան կարողանա ձեռնարկել, հայտնում է «Ինտերֆաքսը»:
Թերթը պարզաբանում է, որ նման քննարկումները կապված են Ռուսաստանում փետրվարին կատարվածի հետ, երբ Չելյաբինսկի մարզում երկնաքար էր պայթել: Դրանից անմիջապես հետո ավելի խոշոր չափերի աստերոիդ էր անցել Երկրի վրայով՝ 27,6 հազար կմ հեռավորությունից:
Բոլդենը հայտնել է, որ ՆԱՍԱ-ում Երկրի համար հավանական վտանգ ներկայացնող 95% խոշոր աստերոիդներ են հայտնաբերվել: Միաժամանակ, ամերիկացի մասնագետները միայն 10% ավելի փոքր տիեզերական մարմիններ են հայտնաբերել, որոնք մեր մոլորակին բախվելու դեպքում կարող են խոշոր քաղաք ոչնչացնել:
