 Վաշինգտոնի Սմիթսոնյան ինստիտուտի գիտնականները հաստատել են, որ Մարսի վրա վիթխարի ջրանցքների համակարգ գոյություն ունի: Դրանք առաջացել են գրունտային ջրերի՝ կարմիր մոլորակի մակերևույթ դուրս գալու հետևանքով: Հայտնում է Science ամսագիրը:«Մեր աշխատանքը ցույց է տվել, որ մենք թերագնահատել ենք Մարսի մակերևույթի էրոզիայի աստիճանը, և որ ջրանցքների խորությունը մոտավորապես կրկնակի մեծ է, քան ցույց են տվել նախկին հաշվարկները: Դատելով ամեն ինչից՝ այդ ջրանցքներում ջրի աղբյուր են հանդիսացել խորքային գրունտային ջրերը, որոնք կարող էին մակերևույթ բարձրանալ տեկտոնիկ կամ հրաբխային ակտիվության արդյունքում»,-հայտարարել է խմբի ղեկավար Գարեթ Մորգանը: Մոլորակաբանները ուսումնասիրել են MRO զոնդում գտնվող SHARAD ռադարի հավաքած տվյալները:Այն աշխատում է 3-30 մեգահերց ռադիոհաճախականությունների միջակայքում, ինչը թույլ է տալիս նրան ուսումնասիրել հողի՝ մի քանի կմ խորությամբ ստորին շերտերը: Գիտնականներն ուսումնասիրել են Մարսի հասարակածային հատվածը, որտեղ առկա են բազմաթիվ հանգած հրաբուխներ և փոշով ու մոխրով պատված սառույցի ոչ մեծ հանքաշերտեր:
|
