Հայաստանի ֆինանսական շուկայում շարունակվում է ամերիկյան դոլարի վստահ վերելքը: «ՆԱՍԴԱՔՕԷՄԷՔՍ Արմենիա» բորսայում այսօր՝ մարտի 21-ին դոլարի միջին փոխարժեքը հայկական դրամի նկատմամբ կազմել է 419,18 դրամ; Այսպիսով՝ դոլարը կրկնեց վերջին 5 տարվա իր ռեկորդը: Վերջին անգամ դոլարը բորսայում 419,18 դրամ արժեցել է 2012 թ. հունիսի 22-ին, իսկ դրանից ավելի թանկ եղել է 2006 թ. հունիսի 27-ին՝ 419,33 դրամ:

Բորսայում այսօր վաճառվել է 10,5 մլն դոլար, ու չնայած դրան՝ առաջարկի փոխարժեքը շարունակել է մնալ բարձր:

Կանխիկ արտարժույթի շուկայում դոլարի առքի փոխարժեքը բարձրացել է մինչեւ 418 դրամ, վաճառքի նվազագույն փոխարժեքը 420,5 դրամն է:

Forex միջազգային շուկայում եվրոն այսօր սակարկվել է 1,29 դոլարին մոտ: Եվրոյին ճնշել է այն տեղեկատվությունը, որ եվրոյի գոտում արտադրական ակտիվությունը մարտին նվազել է;

Ռուսաստանի կենտրոնական բանկը նվազեցրել է դոլարի փոխարժեքը ռուբլու նկատմամբ՝ 1 դոլարն արժե 30,8923 ռուբլի: