Ճապոնիայում ավերիչ ցունամիից երկու տարի անց ԱՄՆ ափի մոտ շարունակում են «անակնկալներ» լողալ: Օրերս հոսանքը ափ է նետել փոքր ձկնրոսական նավակ, որը հայտնաբերել են Վաշինգթոն նահանգի Լոնգ-Բիչ թերակղզու մոտ` Ճապոնիայի ափից 4500 մղոն (մոտ 7 հազար կմ) հեռավորության վրա:
Վեցմետրանոց նավակի տախտակամածը ծածկված է եղել խեցիներով եւ ծովի այլ բնակիչներով: Փորձագետները, սակայն, նրա վրա կարողացել են ճապոներեն մակնշում հայտնաբերել: Բնակչությանը խնդրել են առայժմ հեռու մնալ նավակից:
Սա առաջին դեպքը չէ, երբ օվկիանոս նետված առարկաները գտնում են ԱՄՆ ափերի մոտ: 2012թ. հունիսին Օրեգոնի ափի մոտ 165 տոննա քաշով լողացող դոկ են հայտնաբերել: Գտել են նաեւ պենոպլաստի, կենցաղային տեխնիկայի կտորներ, սառնարաններ, արկղեր, ծովային փարոսներ եւ անգամ ֆուտբոլային գնդակ: Փորձաքննությունը ցույց է տվել, որ դրանք լողալով Ճապոնիայից հասել են ԱՄՆ ափ:
Ցունամին Ճապոնիային հարվածել էր 2011թ. մարտի 11-ին, տարերքի հետեւանքով զոհվել էր մոտ 16 հազար մարդ, 6 հազարը վիրավորվել էր: Խաղաղ օվկիանոսում հինգ միլիոն տոննա աղբ էր թափվել:
